Yn ystod ei waith, mae'r Comisiwn Elusennau yn gwneud amryw helaeth o benderfyniadau. Mae'r penderfyniadau hynny'n amrywio o gofrestru sefydliad fel elusen neu beidio, i benderfyniadau sy'n cael eu gwneud wrth ddarparu cyngor, arweiniad a chymorth i sefydliadau elusennol yng Nghymru a Lloegr, i benderfyniadau ynghylch sut rydym yn delio ag achosion o gamddefnydd neu gamweinyddu honedig.

Pan fyddwn yn gwneud penderfyniadau rydym yn gofalu ein bod yn sicrhau eu bod yn cael y penderfyniadau hynny'n gywir a bod unrhyw benderfyniad er lles y sefydliad arbennig dan sylw. Fodd bynnag, cydnabyddwn y gall cwsmer deimlo o bryd i'w gilydd nad ydym wedi gwneud y penderfyniad cywir a dyma pryd y bydd ein gweithdrefnau adolygu penderfyniadau yn cael eu rhoi ar waith. Nod Adolygiad o Benderfyniad yw sicrhau mai penderfyniad y Comisiwn yw'r un cywir, yn yr ystyr ein bod wedi arfer ein pwerau yn briodol ac yn cydymffurfio â'n hamcanion statudol. Rydym hefyd yn gwneud yn siŵr bod y rhesymau dros ein penderfyniadau wedi cael eu mynegi'n ddigonol.

Os ydym yn cytuno i gynnal Adolygiad o Benderfyniad, fel arfer caiff y broses ei chynnal o fewn uchafswm o 3 mis. Rheolir y broses gan Wasanaethau Cyfreithiol a'i chydlynu gan y Tîm Ymgyfreitha ac Adolygu. Y penderfyniad a gewch yn dilyn y broses adolygu penderfyniad yw penderfyniad terfynol y Comisiwn.

Fel arall, os ydych yn anfodlon â phenderfyniad, efallai y byddwch yn gallu gwneud cais i'r Tribiwnlys Haen Gyntaf (Elusen). Cewch fanylion ynghylch sut i gysylltu â'r Tribiwnlys ar waelod y dudalen hon. Nid oes rhaid i chi fynd trwy ein proses adolygu penderfyniad cyn gwneud cais i'r Tribiwnlys.

Gallwch gael arweiniad pellach ar ba benderfyniadau rydym yn barod i'w hadolygu ac am y weithdrefn Adolygiad o Benderfyniad yn ein canllaw Yn anfodlon ag un o benderfyniadau'r Comisiwn: Sut gallwn ni eich helpu chi'. I gael syniad o'r mathau o adolygiad y byddwn yn eu cynnal gallwch weld ein penderfyniadau cyhoeddedig.

Sut i ofyn i ni adolygu penderfyniad

Os hoffech i chi ofyn am Adolygiad o Benderfyniad ar ôl darllen ein canllaw, gallwch gwblhau'r ffurflen hon ar-lein.

Os nad ydych yn cwblhau'r ffurflen ar-lein, argraffwch y fersiwn PDF o'r ffurflen a'i dychwelyd i'r Comisiwn Elusennau Uniongyrchol. Bydd ffurflen a ddychwelir drwy'r e-bost, llythyr neu ffacs yn hysbysiad ffurfiol digonol o'ch cais am adolygiad.

Tribiwnlys Haen Gyntaf (Elusen)

Os ydych yn anfodlon â phenderfyniad y Comisiwn efallai y byddwch yn gallu apelio neu wneud cais am adolygiad i'r Tribiwnlys. Mae Atodlen 6 o Ddeddf Elusennau 2011 yn amlinellu pwy sy'n gymwys i wneud cais am apêl neu apelio am adolygiad ar gyfer pob math o benderfyniad.

Mae'r Tribiwnlys Haen Gyntaf (Elusen) yn gorff cyfreithiol annibynnol sydd â'r pŵer i ailystyried rhai o benderfyniadau’r Comisiwn a diddymu, newid neu ychwanegu atynt. Mewn rhai achosion gall y Tribiwnlys ein cyfarwyddo i weithredu ymhellach neu gywiro ein penderfyniad.

Gellir cysylltu â'r Tribiwnlys fel a ganlyn:

Rheolwr y Tribiwnlys Haen Gyntaf (Elusen)
Canolfan Cymorth Gweithredol y Tribiwnlysoedd
Blwch SP 9300
Caerlŷr
LE1 8DJ
Ffôn: 0300 123 1711
Ffacs: 0116 249 4253
E-bost